Her ek zakhm ka chehra gulaab jaisa hai
Magar yeh jagta manzar bhi khuwab jaisa hai

Yeh talkh talkh sa lehja, yeh tez tez si baat
Mizaaj-e-yaar ka aalam sharaab jaisa hai

Mera sukhn bhi chaman der chaman shafaq ki phawar
Tera badan bhi mehekte gulaab jaisa hai

Bara taveel, nihayat hasee?n, bohot mabhum
Mera sawal tumhare jawaab jaisa hai

Tu zindagi ke haqayeq ki teh main yoon na uter
Ke is nadi ka bahao chanaab jaisa hai

Teri nazar hi nahin harf aashnaa werna
Her ek chehra yahan per kitaab jaisa hai

Chamak uthe to samandar, bujhe to rait ki leher
Mere khayal ka darya saraab jaisa hai

Tere qareeb bhi reh ker na pa sakoo?n tujh ko
Tere khayal ka jalwa habaab jaisa hai